பிளிறல்

வியாழன், 5 டிசம்பர், 2013

நந்தமிழ்ப் பிள்ளைகள் நாடிக் கற்றிட

அந்தமழ் வழியினில் கல்வி இல்லையாம்!

பைந்தமிழ் அன்னையின் படிமம் வைப்பராம்!

செந்தமிழ் அழித்திடச் செய்யும் சூதிது.

(புதுவைத்தெளிதமிழ் இதழில்(17-11-2019) வந்தது)

திட்பத் துணையாய்த் திகழ்ந்தே இனமழி தீச்செயலில்

நுட்பக் கரவினில் நொய்சிங் களருக்கே நோன்றுதவி

ஒட்பிலாப் ‘பக்சே’ ஒடுக்கு மிலங்கையை ஓர்ந்ததுவே

நட்புநா டென்று நவில்வதெல் லாமொரு நாடகமே! (18-10-2013 புதுவைத் 'தெளிதமிழ்' இதழில் வந்தது)

அனைத்தரசுப் பள்ளியிலும் ஆங்கிலம்தான் என்றே

அனைவர்க்கும் கல்விமொழி ஆக்க – முனைந்தார்!

கனன்று தடுத்திடுவோம்! கண்டிப்போம்! வாரீர்!

இனமழிக்கும் வேலை இது. (புதுவைத் ‘தெளிதமிழ்’ இதழில் வெளிவந்தது)

மன்பதையைக் கூறாக்கும் மண்அரத்த ஆறாக்கும்

புன்மதம் சாதி புதையாழம்! – அன்புடனே

நல்லிணக்கம் நாடிடுக! நஞ்சாம் மனுமறைகள்

புல்லர்சொல் தள்ளுபுறம், பொய்!

அல்லல்கட் டில்லென்றே ஒல்கஅறு!

நீர்மறுப்பும் மின்பறிப்பும் நீளும் மொழித்திணிப்பும்

ஊர்நா டுலகெதிர்தீங்(கு) ஊறுலையும் – தீர்வுண்டோ?

வல்லிருப்(பு) அல்லல்கட் டில்லென்றே ஒல்கஅறு

வல்விலங்கு புல்லநீ மாறு!

(புதுவைத் ‘தெளிதமிழ்’ இதழில் வெளிவந்தது) புல்ல = போல (உவம உருபு)

தாய்மொழியில் பேசினால் தண்டனை பள்ளியிலே!

தாய்தந்தை பேரும் தமிழில்லை! – போய்வணங்கச்

சொற்றமிழ்க் கில்லையிடம்! சொல்லுகநா டில்லையிது

கற்றைக்கு முட்டைக்குங் காடு.

அழகார் தமிழில் அயன்மொழிச் சொற்கள்

புழங்கக் கலந்தெழுதல் புன்மை! – வழக்கமென

நற்றமிழ்க்(கு) ஊறுறுத்த நாடி எழுதுலகு

கற்றைக்கு முட்டைக்குங் காடு.

(கல் தைக்கும் முள் தைக்கும் காடு > கற்றைக்கு முட்டைக்குங் காடு)

புதுவை ‘தெளிதமிழ்’ இதழில் வெளிவந்தவை.